Պետք է զրոյանաս, հավասարվես հողին նորից ծնվելու, լցվելու ու ինքդ քեզ գտնելու համար: Եթե ինձ ինչ-որ մեկը սա ասեր տարիներ առաջ, ի պատասխան շատ բարձր կծիծաղեի, բայց… Բայց երբեմն կյանքում լինում են բաներ, որ դու ինքդ կառավարել կամ փոխել չես կարող… այսօր… Բայց չէ՞ որ կա վաղը։ Վաղը դու կարող ես լինել ու դառնալ ավելին, կարող ես լինել ու դառնալ քո լավագույն տեսակը…

Ես ժամանակ տվեցի ինքս ինձ վերագտնելու, ինքս ինձ ճանաչելու ու վերջապես հասկանալու, թե որն է այս կյանքում իմ կոչումը, ինչն եմ ես սիրում ամենից շատ, և վերջապես՝ որն է էներգիայի իմ աղբյուրը… Ես փորում ու փնտրում էի շատ խորը, հատ առ հատ թերթում անցած ճանապարհիս էջերը… Իմ էջերը՝ որպես հաղորդավար, ասմունքող, խմբագիր, դասախոս… Բացի ինձանից, ի՞նչն էր միավորում նրանց… Պատասխանը որքան հեռու էր թվում, այնքան մոտ գտնվեց՝ խոսքի ուժը… անբացատրելի ուժը, որը դռներ է բացում, տալիս է թևեր, ստեղծում նորանոր հնարավորություններ: Խոսքի ուժն անբեկանելի է՝ առաջին «մամ» բառից սկսած մինչև մեծ բեմեր, հաջողված հարցազրույցներ ու հաղթանակած բանակցություններ…

Պատասխանն իմ անցած ճանապարհի ու իմ արյան մեջ էր: Ես հասկացա, որ պիտի շարունակեմ այն, ինչ սկսել էր տատիկս՝ մեծ Հրաչուհին. ես պիտի նրա պես օգնեի մարդկանց գտնել իրենց ձայնն ու խոսքի ուժը… Ինչո՞ւ։ Որովհետև կարող էի ու գիտեի՝ ինչպես… Նա ինձ սովորեցրել էր, իրենից հետո էլ թողել էր գրքեր, որոնց էջերին ասես հուշելու համար նախապես նշել էր կարևորագույնը։ Ասես գիտեր, որ երբ ժամանակը գա, բացելու եմ դրանք..

Հայրս ինձ միշտ ասում է. «Արա այն, ինչ պետք է, ու թող լինի այն, ինչ կլինի…»։

Այս ընթացքում ես հնարավորություն եմ ունեցել աշխատելու բազմաթիվ մարդկանց հետ՝ գրասենյակային աշխատողներից մինչև քաղաքական գործիչներ ու բիզնես ոլորտի ներկայացուցիչներ… Անկախ տարիքից կամ աշխատանքի բնույթից՝ նրանց բոլորին միավորում էր խոսքի միջոցով սեփական ձայնը լսելի դարձնելու մեծ ցանկությունը… Մեծ ճանապարհի առաջին քայլը…

Ես այստեղ եմ՝ քեզ հետ անցնելու այդ ճանապարհը, գտնելու քո ձայնը, խոսքիդ կշիռ հաղորդելու և ի գործ դնելու հենց քո՛ խոսքի ուժը…

Հիշի՛ր՝ անգամ լռության մեջ` մտքում, ասված խոսքերը պետք է հնչեն ճիշտ առոգանությամբ ու հստակ հնչյուններով…

- Հրաչուհի Ութմազյան

 

ԻՆՉԻ՞ ՄԱՍԻՆ Է ԱՅՍ ԱՄԵՆԸ

Յուրաքանչյուրիս խոսքը կամ խոսելու ձևը խիստ անհատական է, ինչպես և մեր բոլոր մյուս հատկանիշները։ Սակայն մեր բազային կարողությունների հիման վրա հնարավոր է զարգացնել համապատասխան տեխնիկա ավելի գրագետ, վստահ ու տպավորիչ հանրային խոսքի համար։ Տեխնիկան որքան ընդհանրական, նույնքան էլ տարբեր է մարդկանց համար։ «Հանրային խոսք» քոուչինգ ծրագիրը անհատական կարիքների հիման վրա մշակված փաթեթ է՝ նախատեսված անհատական հանդիպումների ու վարժությունների համար։ Միաժամանակ առկա են նաև խմբային թրեյնինգների փաթեթներ. ներկայացվում են հիմնարար, ընդհանրական կոնցեպտներ՝ կիրառելի բոլորի համար։

ԽՈՍՔԻ ՓՈԽԱԿԵՐՊՄԱՆ ՀԻՄՆԱԿԱՆ ՈՒՂՂՈՒԹՅՈՒՆՆԵՐՆ ԵՆ`

Գրագետ խոսքի կառուցում

Հուզմունքի հաղթահարում

Ելույթների տեսակներ

Արտասանություն, ինտոնացիա

Լսարանի հետ կապ և ժեստեր

Մեդիայի հետ աշխատանք

Շնչառություն

Վիզուալ ատրիբուտներ

Անձնային որակներ և անհատական ոճ

ԹՐԵՅՆԻՆԳԸ ՆԱԽԱՏԵՍՎԱԾ Է

Բիզնես առաջնորդների

Թիմերի ղեկավարների

Քաղաքական լիդերների

Մամուլի խոսնակների

Բոլոր նրանց համար, ովքեր ցանկանում են ավելի լավ խոսել